Vai a sottomenu e altri contenuti

Bonus ìdricu: avisu e modalidade

UNIONE DE SOS COMUNES DE SU BARIGADU

Ardaule - Bidoniu - Busache - Fordongianus - Neoneli - Nughedu Santa Itòria - Samugheo - Sorradile - Ula

Localidade Giolantine - (09082) Busache (Aristanis) -

Còditze Fiscale e Partida I.V.A. 01116420959

situ web: www.unionecomunibarigadu.it - posta eletrònica: info@unionecomunibarigadu.it

AVISU PÙBLICU

AGIUDU PRO SAS TARIFAS A CARÀTERE SOTZIALE

BONUS ÌDRICU

Si informant sos tzitadinos ca dae su 1 de TRÌULAS 2018 sas famìlias chi tenent su rèdditu bassu, chi tenent sos rechisidos prevididos dae sa normativa, ant a pòdere pedire in sos ufìtzios de su servìtziu sotziale DE SU COMUNE PRÒPIU de residèntzia, in prus de su bonus elètricu, un'iscontu in sa bulleta de s'abba cunforma a sas tarifas pro sas utèntzias domèsticas aplicadas dae su gestore ìdricu locale.

A manera prus pretzisa de s'agiudu nde podent benefitziare totu sas famìlias chi tenent indicadore ISEE prus bassu de 8.107,50 èuros. Su lìmite pigat a 20.000 èuros pro sos nùcleos cun prus de tres fìgios a càrrigu pro su chi pertocat su fiscu (cunditziones giai prevididas pro benefitziare de su bonus elètricu).

Duncas dae sa data subranumenada chie tenet sos rechisidos pro pedire su bonus elètricu at a pòdere pedire fintzas su bonus pro sa fornidura de s'abba chi est un'iscontu subra sa tarifa chi pertocat a su servìtziu de acuedotu pro sos utentes domèsticos residentes in cunditziones de discumbèniu econòmicu. Tenent su diritu a su bonus fintzas sos utentes chi tenent unu cuntratu de fornidura diretu chi bivent in unu condomìniu (e su titulare de su contratu de fornidura cointzidat cun su condomìniu etotu).

Pro àteras informatziones si podet domandare a sos ufìtzios de su Servìtziu sotziale de su Comune pròpiu de Residèntzia e/o abbaidare in su situ de s'Autoridade de Regulatzione pro s'Energia Retes e Ambiente ARERA www.arera.it o www.sportelloperilconsumatore.it o telefonare a su nùmeru birde 800166654.

Busache, 03.07.2018

Su Responsàbile de su Servìtziu Sotziale Assotziadu

D.ssa Barbara Casula

MODALIDADES PRO SU BONUS ÌDRICU

ITE EST SU BONUS ÌDRICU O BONUS DE S'ABBA?

Dae su 1 de trìulas 2018 s'at a pòdere pedire su bonus sotziale ìdricu o bonus de s'abba pro sa fornidura de s'abba.

Est unu provedimentu chi tenet sa punna a reduire s'ispesa pro su servìtziu de acuedotu de una famìlia in cunditzione de disàgiu econòmicu e sotziale.

Est prevididu dae su decretu de su Presidente de su Consìgiu de sos ministros 13 de santugaine 2016, ufitzializadu a norma de s'artìculu 60 de su Collegadu Ambientale (lege 28 de nadale 2015, n. 221) e a pustis atuada cun provedimentos de s'Autoridade de Reguladura pro Energia Retes e Ambiente.

Acunsentit de non pagare una cantidade mìnima de abba a persone a s'annu. Custa cantidade est istada istabilida in 50 litros a sa die a persone (18,25 mc de abba a s'annu), chi est su tantu chi serbit pro sas netzessidades essentziales.

Chie nde tenet diritu

  • chie nde tenet diritu?
  • chie est s'utente diretu?
  • chi est s'utente indiretu?

Comente e in ue si pedit

  • in ue si presentat sa domanda?
  • cales documentos serbint pro presentare sa domanda?
  • si podet delegare un'àtera persone pro presentare sa domanda?
  • potzo pedire su bonus de s'abba paris cun cussu pro s'energia elètrica e gas?
  • tèngio giai su bonus elètricu/gas, comente potzo cunformare sas iscadèntzias diferentes?

Cantu balet su bonus e comente si retzit

  • cantu balet su bonus de s'abba?
  • comente benit pagadu su bonus?
  • comente si verìficat si sa domanda pròpia de bonus at tentu èsitu bonu?
  • comente si verìficat si su bonus erogadu est giustu?
  • a pustis de cantu tempus dae sa presentatzione de sa domanda apo a retzire su bonus?
  • cales problemas bi diant pòdere èssere in sa gestione de sa pràtica de su bonus?
  • pro cantu tempus est vàlidu su bonus?

Rinnovu e variatzione

  • comente si faghet sa domanda pro torrare a tènnere su bonus?
  • ite bisòngiat fàghere si càmbiat su nùmeru de sos familiares in su perìodu de giuamentu?
  • ite sutzedet in casu de càmbiu de s'indiritzu de residèntzia o de acabbu de su cuntratu?

Bonus integrativu locale

  • Ite est su bonus integrativu?
  • Chie nde tenet diritu? In ue e comente si podet pedire? Cantu balet?
  • Su gestore meu erogaiat giai su bonus, ddu potzo sighire a pedire?

Chie nde tenet diritu?

Tenent su diritu de otènnere su bonus de s'abba sos utentes diretos e indiretos de su servìtziu de acuedotu in cunditziones de disàgiu econòmicu sotziale, est a nàrrere chi faghent parte de famìlias:

 cun indicadore ISEE non prus artu de 8.107,5 èuros;

 cun indicadore ISEE non prus artu a 20.000 èuros si b'at a su nessi 4 fìgios a càrrigu.

Chie est s'utente diretu?

Est s'utente finale in cunditziones de disàgiu econòmicu sotziale a manera direta titulare de una fornidura pro su servìtziu de acuedotu a impreu domèsticu residente.

Chie est s'utente indiretu?

Est una de sas persones chi faghent parte de su nùcleu ISEE in cunditziones de disàgiu econòmicu sotziale, chi in s'abitatzione de residèntzia impreat una fornidura pro su servìtziu de acuedotu intestada a un'utèntzia condominiale.

Comente e in ue si pedit

In ue si presentat sa domanda?

Sa domanda pro otènnere su bonus de s'abba si presentat, in forma de autotzertificatzione, a su Comune pròpiu de residèntzia o a un'àteru ente designadu dae su Comune (CAF, Comunidades montanas) impreende sos mòdulos apòsitos chi ant a èssere publicados in custu situ (www.arera.it), in su situ www.sgate.anci.it e a disponimentu in sos sitos internet de sos Gestores e de sos Entes de Guvernu de s'Àmbitu.

Cales documentos serbint pro presentare sa domanda?

Pro presentare sa domanda, in prus de su mòdulu cumpiladu cun sos datos anagràficos pròpios e sos riferimentos chi identìficant sa fornidura, serbint:

 unu documentu de identidade;

 una dèlega eventuale;

 un'atestatzione ISEE vàlida (no iscadida);

 un'atestatzione cun sos datos de totu sos chi faghent parte de su nùcleu ISEE (nùmene-sambenadu e còditze fiscale);

 un'atestatzione pro su reconnoschimentu de famìlia numerosa (a su nessi 4 fìgios a càrrigu), si s'ISEE est prus artu de 8.107,5 èuros (ma non prus artu de 20.000 èuros).

Sas informatziones pro identificare sa fornidura si agatant in sa bulleta e sunt:

 su còditze fornidura;

 su nominativu de su gestore ìdricu (su sugetu chi gestit su servìtziu de acuedotu e chi emitet sa fatura).

In casu de un'utente indiretu custas duas ùrtimas informatziones non sunt obligatòrias, ma in ogni casu est mègius a ddas tènnere a disponimentu cando si presentat sa domanda.

Faghet a delegare un'àtera persone pro presentare sa domanda?

Eja, compilende una dèlega apòsita cun sas generalidades de sa persone chi si cheret delegare.

Potzo pedire su bonus de s'abba paris cun cussu pro s'energia elètrica e gas?

Eja, su mòdulu de rechesta, chi at a èssere publicadu in custu situ (www.arera.it), in su situ www.sgate.anci.it e a disponimentu in sos sitos internet de so Gestores e de sos Entes de Guvernu de s'Àmbitu, permitint de pedire paris fintzas su bonus elètricu e/o gas.

Tèngio giai su bonus elètricu/gas, comente potzo pònnere paris sas iscadèntzias diferentes?

A sos utentes chi cando presentant sa domanda pro su bonus de s'abba ant a resurtare giai titulares de unu bonus elètricu e/o gas pedidu o rinnovadu in su 2018 a manera comune (una domanda ebbia presentada paris pro su bonus elètricu e gas) o separadas (duas domandas presentadas in tempos diferentes), at a èssere connotu unu perìodu de giuamentu pro su bonus ìdricu torradu in paris cun su perìodu de giuamentu de su bonus elètricu e/o gas. Pro nàrrere:

 si sa domanda elètrica e gas est istada presentada paris, su perìodu de giuamentu de su bonus ìdricu at a èssere torradu paris a cussu de sos bonus elètricu e gas. Pro nàrrere, si su perìodu de giuamentu de su bonus elètricu e gas est dae su 1u de abrile 2018 a su 31 de martzu 2019, fintzas su perìodu de giuamentu pro su bonus pro s'abba at a èssere dae su 1u de abrile 2018 a su 31 de martzu 2019 fintzas si sa domanda pro su bonus abba est presentada a pustis de su 1u de trìulas;

 si sas domandas de bonus elètricu e gas non sunt istadas presentadas paris in su 2018, duncas sunt separadas, su perìodu de decurrèntzia de su bonus ìdricu at a èssere alliniadu a unu ebbia de sos duos bonus giai presentados e de pretzisu a cussu presentadu a pustis. Pro nàrrere, si sa decurrèntzia de su bonus elètricu est 1u de abrile 2018 - 31 de martzu 2019, e cussa de su bonus gas est 1u de làmpadas 2018 - 31 de maju 2019, su perìodu de giuamentu pro sa domanda ìdrica at a èssere cunformadu leende comente riferimentu su bonus gas (domanda fata a pustis).

DE IMPORTU: Su gestore de su servìtziu de acuedotu at a dare a s'utente, pro su 2018 ebbia, in prus de su bonus abba pro totu su perìodu de giuamentu istabilèssidu cunforma a sas modalidades giai indicadas subra, fintzas una cuota pro cumpensare una tantum pro su perìodu dae su 1u de ghennàrgiu 2018 e a su perìodu beru de giuamentu. In su casu de s'esèmpiu iscritu subra (perìodu de giuamentu: 1u de làmpadas 2018 - 31 de maju 2019), sa cuota una tantum at a èssere pro su perìodu dae su 1u de ghennàrgiu 2018 a su 31 de maju 2018.

Fintzas si s'utente presentat ebbia sa domanda ìdrica sa cuota una tantum at a èssere pro su perìodu dae su 1u de ghennàrgiu 2018 e s'incomintzu de su perìodu de giuamentu chi, in custu casu, at a èssere a pustis de su 1u de trìulas 2018.

Cantu balet su bonus e comente si retzit

Cantu balet su bonus abba?

Su bonus abba garantit sa fornidura gratùita de 18,25 metros cubos de abba a s'annu (paris a 50 litros/abitante/a sa die) pro ogni persone de sa famìlia anagràfica de s'utente. Custa cantidade est istada istabilèssida dae su decretu de su Presidente de su Consìgiu de sos ministros 13 de santugaine 2016 comente cussa mìnima netzessària pro assegurare su tantu de abba chi serbit pro sos bisòngios de fundamentu de sa persone. Su bonus at a garantire, pro nàrrere, a una famìlia de 4 persones de non dèpere pagare 73 metros cubos de abba a s'annu. Sa tarifa giuada aplicada dae su gestore no est ùnica a livellu natzionale, duncas pro determinare cale siat su currispetivu (tarifa giuada) chi depet èssere aplicadu a sos 18,25 metros cubos e ischire su valore de su bonus, s'utente at a pòdere abbaidare in su situ de su gestore pròpiu in ue ant a èssere publicadas sas informatziones chi pertocant sa tarifa giuada aplicada e carculare s'importu de su bonus abba chi dd'ispetat.

Comente est pagadu su bonus?

Su bonus abba at a èssere erogadu cun custas modalidades diferentes:

 Pro sos utentes diretos, s'erogatzione si faghet in sa bulleta. S'importu annuale est erogadu pro-cuota a sa die e in ogni bulleta chi registret sos consumos chi pertocant su perìodu de giuamentu ddu at a èssere una parte de su bonus proportzionale a su perìodu chi pertocat sa bulleta etotu.

 Pro sos utentes indiretos, su gestore at a erogare su bonus totu in una borta, pro nàrrere cun s'acrèditu in su contu currente (bancàriu o postale) o cun un'assegnu tzirculare non trasferìbile o cun cale si siat àtera modalidade seberada dae su gestore, bastat chi si potzat controllare e duncas si potzat verificare.

Comente si verìficat si sa domanda de bonus abba fata est renèssida bene?

De sòlitu si podet averiguare, comente est andende a in antis sa rechesta pròpia de bonus, impreende sos riferimentos chi bi sunt in sa comunicatzione de ammissione chi s'utente mandat o fintzas:

 domandende a s'Ente in ue est istada presentada sa rechesta (su Comune de residèntzia, su CAF, sa Comunidade Montana, àteros) cun sa retzida chi est istada dada a sa cunsigna de sa domanda;

 telefonende a su nùmeru birde 800.166.654 de s'Isportellu pro su consumadore de Energia e Ambiente e dende su còditze fiscale o su nùmeru identificativu de sa rechesta chi ddu est in sa lìtera de ammissione;

 consultende su situ www.bonusenergia.anci.it, in sa setzione riservada 'Controlla on line la tua pratica', in ue s'intrat cun su còditze fiscale pròpiu e sas credentziales de atzessu (User ID e password) comunicadas in sa lìtera de ammissione.

Comente si verìficat si su bonus erogadu est giustu?

Pro verificare si su bonus erogadu est giustu, sos utentes diretos podent controllare sa bulleta issoro, in sa setzione de su cuadru de resumu dedicada a sos particulares de ognuna de sas boghe chi formant su totale de sos importos faturados. Sa parte bonus est indicada separada bogada dae sa cuota variàbile de sa tarifa de acuedotu pro totu su perìodu de giuamentu.

Sos utentes indiretos podent verificare si est giustu controllende s'acrèditu, s'assegnu o cale si siat àtera modalidade de pagamentu impreada dae su gestore pro s'erogatzione fata.

A pustis de cantu tempus dae sa presentatzione de sa domanda m'ant a dare su bonus?

Dae cando si presentat sa domanda a s'erogatzione de su bonus abba podent passare meses. Difatis a pustis de àere presentadu sa domanda de bonus a su Comune pròpiu de residèntzia o a sos CAF abilitados, sos tempos pro otènnere su bonus sunt custos:

 su Comune tenet a disponimentu, a su prus, 30 dies pro sa verìfica e s'ammissione de sa domanda e a pustis pro dda carrigare in su sistema informàticu (SGAte) pro sa trasmissione a su gestore;

 A pustis chi su Comune dd'at carrigada sa domanda est atzetada:

o s'utente retzit una comunicatzione chi dd'informat de sos resurtados de sas primas valutatziones pro sos rechisidos de ammissibilidade (ISEE e residèntzia) fatas dae su Comune;

o su gestore tenet a disponimentu a su prus 60 dies pro acabbare sas valutatziones de cumpetèntzia sua e comunicare a SGAte s'ammissione definitiva de sa domanda o su refudu suo.

Passadas custas 60 dies, si sa domanda est istada verificada a manera positiva dae su gestore:

 sos utentes diretos, ant retzire su bonus in sa bulleta in sa prima fatura ùtile. S'erogatzione de su bonus in bulleta est acapiadu fintzas a sa cadèntzia de faturatzione previdida dae su cuntratu de fornidura;

 sos utentes indiretos ant retzire su bonus a su prus a intro de àteras 60 dies.

Totu sos utentes, chi sa domanda at a resurtare refudada, ant retzire una comunicatzione cun sa resone de pro ite su gestore no at pòdidu cunfirmare s'ammissione.

Pro cantu tempus est su bonus?

Su bonus est pro unu perìodu de 12 meses dae sa die chi incomintzat su giuamentu indicadu in sa comunicatzione de ammissione e in sa bulleta. Acabbadu custu perìodu, pro tènnere unu bonus nou, s'utente depet torrare a fàghere sa domanda de ammissione presentende sa domanda apòsita.

Cales dificultades si diant pòdere verificare in sa gestione de sa pràtica de bonus?

Comente pro sos bonus elètricu e gas, fintzas pro su bonus abba sas pràticas ant a èssere gestidas pro mesu de su sistema informàticu SGAte, chi ddu podent impreare sos Comunes e sos CAF delegados. In prus de sos Comunes e de sos CAF abilitados, tenent s'òbligu de si acreditare a su sistema SGAte fintzas sos gestores de su servìtziu de acuedotu.

Difatis, si unu gestore non s'acrèditat, SGAte non renesset a ddi trasferire sa pràtica pro sas verìficas de cumpetèntzia sua e pro s'erogatzione de su bonus.

Si su gestore non faghet s'acreditamentu sos utentes interessados ant retzire una comunicatzione chi ddos at a informare ca tenent sos rechisidos pro pedire su bonus (ISEE intro de su lìmite) ma pro ddu tènnere si depent indiritzare in deretura a su gestore issoro (chi at a dèpere fàghere sos controllos de cumpetèntzia pròpia) in sos giassos de cuntatu aprontados dae su gestore pro s'utèntzia (isportellos fìsicos o situ web).

Rinnovu e variatziones

Comente si rinnovat sa domanda de bonus?

Si acabbadu de su tempus de su primu giuamentu s'utente tenet ancora sos rechisidos netzessàrios pro s'ammissione (ISEE intro su lìmite istabilidu, unu cuntratu de fornidura pro su servìtziu de acuedotu in s'abitatzione de residèntzia) podet rinnovare sa rechesta de bonus presentende domanda apòsita a su Comune de residèntzia o sos CAF abilitados.

Sa domanda si depet presentare prus o mancu unu mese in antis de s'iscadèntzia de su giuamentu in vigore (si, pro nàrrere, su perìodu de giuamentu est dae su 1-9-2018 a su 31-08-2019, su rinnovu si depet presentare a intro de su 30 de trìulas 2019) pro garantire chi sigat s'erogatzione. Una comunicatzione apòsita benit mandada a totu sos utentes interessados cando est acanta s'iscadèntzia, pro ammentare sa data ùtile pro su rinnovu in continuidade.

Pro su rinnovu s'utente depet presentare un'atestatzione ISEE vàlida pro su perìodu de su giuamentu nou. Pro s'ùrtimu esempru fatu, su tzertificadu ISEE at a dèpere èssere vàlidu fintzas su 1u de cabudanni 2019.

Ite tocat a fàghere si càmbiat su nùmeru de sos familiares in su perìodu de giuamentu?

Si su nùmeru de sos familiares est mudadu in su perìodu de giuamentu, podet èssere comunicadu cando si torrat a fàghere a nou e balet pro su càrculu de su bonus pro su perìodu nou de giuamentu.

De ogni manera si s'utente presentat a su gestore ìdricu suo, in sos 12 meses de vigèntzia de su bonus, un'autotzertificatzione cunforma a su DPR 445/2000 de variatzione de su nùmeru de sos chi faghent parte de sa famìlia e decrarat chi custa variatzione non mudat sa cunditzione de disàgiu econòmicu, (est a nàrrere ca s'ISEE abarrat a intro de su lìmite istabilidu), su gestore at a adeguare su cumpensu de su bonus a su nùmeru nou de sos familiares pro su perìodu chi mancat a s'acabbu de sos 12 meses de vigèntzia de su giuamentu.

Ite sutzedet si càmbiat s'indiritzu de residèntzia o sessat su cuntratu?

Si in su perìodu de giuamentu sessat su cuntratu de fornidura intestadu a s'utente agiuadu (pro nàrrere ca mudat sa residèntzia o pro àteras resones), su gestore at a pònnere sa cuota de bonus ch'ispetat e no ancora erogada - a cobertura de su perìodu de giuamentu chi abarrat - in s'ùrtima fatura.

Pro nàrrere, si su perìodu de giuamentu est dae su 1u de cabudanni 2018 a su 31 de austu 2019 e s'utente càmbiat residèntzia in su mese de abrile 2019, at a retzire, in sa fatura chi serrat sa fornidura chi est sessada ca sa residèntzia est cambiada, s'importu de bonus prevididu fintzas a su 31 de austu 2019.

Ne s'utente interessadu ne àtere chi faghet parte de su nùcleu ISEE suo ant a pòdere presentare una domanda noa de bonus abba in antis chi acabbet su perìodu originàriu de giuamentu.

Bonus integrativu locale

Ite est su bonus integrativu?

Est unu giuamentu de megioru istabilidu a livellu locale: podet cumportare su reconnoschimentu de unu benefìtziu econòmicu agiuntivu o diferente dae su bonus abba. Pro nàrrere s'Ente de Guvernu de s'Àmbitu (EGA) cumpetente pro su territòriu pròpiu podet detzìdere de connòschere a s'utente finale, a paridade de cunditziones de ammissione, unu bonus abba prus mannu de cantu prevididu a livellu natzionale o podet mudare in mègius sas cunditziones de ammissione artziende su lìmite màssimu de ISEE prevididu. Sos rechisidos pro s'ammissione e sa cuantificatzione de su bonus integrativu sunt duncas detzìdidos a livellu locale e podent èssere diferentes dae cantu istabilidu a livellu natzionale.

Su gestore meu erogaiat giai su bonus, ddu potzo sighire a pedire?

Dipendet dae su gestore e dae s'Ente de Guvernu de s'Àmbitu. Difatis in su territòriu suo su gestore in acordu cun s'EGA podet detzìdere a manera lìbera si sighire o mancu a aplicare sas cunditziones mègius giai prevididas pro sos utentes pròpios.

Chie nde tenet diritu? In ue e comente si podet pedire? Cantu balet?

Sos rechisidos pro benefitziare de su bonus abba integrativu (livellu ISEE o àteru), comente si pedit e cantu balet sunt istabilidos a manera autònoma dae su gestore in acordu cun s'EGA; pro tènnere prus informatziones tocat a domandare a su gestore pròpiu.

ùrtimu agiornamentu su 5 de làmpadas 2018

A chi rivolgersi

A chi rivolgersi - Referente
Ufficio/Organo: Area Affari Generali
Referente: marinella marras
Indirizzo: Piazza Matteotti 2, 09081 Ardauli (OR)
Telefono:
Fax: 0783 651573
Email: demografici@comuneardauli.gov.it
Email certificata:
Scheda ufficio: Vai all'ufficio